Mimîye et Bèbert, c’est deus bons éfants. Come tos les èfants da.Il-ont leus quâlités et leus p’tits dèfauts, come vos com mi. Inte nos-ôtes, mi dj’è n’n’a min-me des gros. DJI sos nawe ! C’est-in laid nom, mins mais qui fait do bén s’apince li spot. Il m’a branmint do coradge po tchèssi m’nawerîye èvôye, et m’mète à scrîre. I m’a falu yessesûr qui dj’rindréve service à mwints èfants po qu’dji m’mète à leu conter ci qu’dj’a oyu dire. Insi, d’abôrd, Mimîye Bèbert, c’est les deus èfants dèl’ since di Luche au Laudge. Li pu laide des habitudes da Mimîye c’est d’suci s’pôce à pô près tote li djoûrnèye. Bèbert, li,  c’est co pîre, i grète dins s’nez branmint pus sovint qu’à s’toûr. Et i gn’a rén à fé po les coridgî, nén pus yink qui l’ôte. C’est nén d’faute qui Papa et Maman n’ont nén prétchî portant . Bèbert, in djoû ou l’ôte vos atraproz in nez come li trompe di l’élèfant qu’vos avoz vèyu à Anvers.Bèbert fait sine qu’oyi… et i stèche si dwè dins nez.

– Mimîye , vos èstoz pire qui l’pus tètau des vias qui dj’euche jamais èlèvé.  Mimîye fait sine qu’oyi… en min-me timps qu’èle douve si bouche po sucî. Dimègne passé, il a ploû tote li djoûrnéye, et les èfants ont yeu l’timps long.  Kwè fé quand on z-a-l’timps long ? Vos l’advinez èndon ? Dji n’a nén dandgî d’vos l’dire. Li lindi au matén, quand l’Moman a intré dins l’tchampe po fé lèver les deus scolis, èle n’a vèyu, po comincî dins l’lé daBèbert, qui deus grandès grîjès tatches et in long gris busia qui ossait dzeus les couvertes.   Tote , èle a couru dé l’lé : Bébert avait ène tièsse d’éléfant ! Èle n’a min-me nén l’fwace di criyî. Èle a rad’mint couru au lé da Mimyîe, et là èle a ridé sus gn’ gnos. Èle estait tcheûte flauwe : Mimîye avait ène tièsse di via ! In quârt d’eûre après , li sinci, sbaré di nén vôye dischinde si feume et ses èfants , a monté là-haut. I n’a nén tcheû flauwe li ! Il a criyî télmint fwârt qui Bèbert et Mimîye s’ont r’wèyî et qui l’sinceresse s’a rastampé come èle a seu. I n’ faut nén d’mander qué pasquèye et qué brèyadge qui ç’a stî ! Quand on z-a yeu mètu Mimîye et Bèbert divant l’murwè , il-ont pinsé po cominci qu’c’estait in masse di cavalcâde qu’on leu-z-avait mètu .

Oyîye ! Quand il-ont yeû satchî d’tos les costés et qu’ils ont compris qui c’ n’ estait éne   fârce, il-ont à mitan sofoqué dins leûs lârmes. Pourtant, is n’ si douténn’t nén co di tot ç’ qui les ratindait. Mins ça n’a wère taurdgî. Quand il-ont stî à tauve po d’djuner, Bèbert ni savait comint s’mète. Mindgî, ça alait cor à d’mèye. Mins bwâre, vos-ôtes ! Heûreusemint qu’l gn’avait des tèles èl cauve : o leu z’ a d’né chakén l’leûr. Mimîye a t’nu l’sène à deux mwins, l’ôte on l’a mètu al tère. Les pôfes parints n’avénn’t kwè féni kwè div’nu. Il espèrénn’t qui c’estait come ène maladîye qu’allait passer come èle avait v’nu, et qu’in matén en s’lèvant, is vièrénn’t dins les deus p’tits lès  ène Momîye et Bèbert avou leu vrèye tièsse. Oyi vos-ôtes. Les djoûs passénn’t mins i gn’avait pont d’candgemint. Bén sûr , al longue is s’ont abitûwé tos les quate i falait bén d’alieûrs. Heureusemint les èfants avénn’t aurdé l’parole et l’raison. C’estait todis ça. Mins bon Diè ! quand les parints vèyénn’t li «tièsse di via » sautler al cwade ou l’èlèfant djouwer aus mas, is n’savénn’t pus si l’ z’ eu falait rire ou bén braire. Is fyénn’t afîye les deus au côp ! Li pî d’tot, c’est qu’ça n’les avait nén coridgî d’leu dèfaut, ni yink ni l’ôte. Mimîye tètait s’pôce pus fwârt qui jamais, si bén fwârt, qu’il estait racoûti d’abôrd do mitan. Bèbert li,  il aréve bin vlu awè des dwès quate côps pus longs. Baguètes, grawîyes, tot ç’ qui lî tchèyait dins les mwins lî estait bon, po forguiner l’ pus long possibe. Min-me qu’in côp, il avait stî fameus’mint sèré. Il avait atrapé l’mète ployant di s’Papa et i l’avait bouré tot displèyi ossi lon qu’il avait seu. Oyi mins, là qui l’ mète s’avait twârdu en montant et i n’èl savait pus r’satchî. I n’n’avait yink di nez à zi-zon-zesses li pôfe Bèbert ! Il avait falu qui s’Papa lî frote si trompe tot doûcet’mint po r’disployî l’mète, timps qui s’moman stètchait ses dwès ossi lon qu’ èle plait po sayî d’ atraper li d’bout. On l’a r’yeu, mins ç’n’a nén stî sins rûges ! Li pus malauji, c’estait d’ catchî à tot l’monde li tèribe rascrauwe. Chaque côp qui v’ nait ène sakî , fuche-t i des vigéns, des parints, ou des p’tits camarâdes di scole ,abîye, abîye, on catchait l’ tièsse di via et l’ tièsse d’èlèfant. In côp , on d’djait : is sont malades, i faut les lèyî dwârmu. Ène ôte côp, on les prétindait èvôye dins l’ famile. Ça âréve co p’tète plus durer in bokè ; mins là wez qu’in bia djoû , c’est Monsieû l’Inspecteûr des scoles qu’a v’nu vôye qué novèles, Li lwè c’est li lwè, a- t- i dit. Les èfants sont-st-oblidgi d’fréquenter li scole et i m’faut sawè ç’qui s’passe vaici, ou don bén dji fait m’rapôrt. Et adon, tant pire por vos sincî, i vos faudrè payî l’aminde. Li sincî grètais s’tièsse, sondjâr ; mins i savait bén d’avance qu’i gn’avait nén à r’nikter et qu’il alait falu mostrer l’tâbleau et èspliquer  l’afaire, si gin-nant qui s’fuche . Monsieur l’Inspecteur pinsait qu’on v’lait djouwer avou s’quénzèn-ne. Il estait fén mwé. Veyant ça, li sincî n’ a pus tchicté. Mimîye et Bébert, alez, v’noz tot d’sûte ! Heureus’mint Monsieûr l’inspecteûr s‘avait achî dins in fauteuil qu’estait ben d’èquére, sins ça, il âréve volé au r’vièrs . Ça ! è n’ n’alait-i. Ça ! Par eximbe ! Ah bén ç’tèl’là ! C’est-st-ainsi brèyait l’Moman en r’frotant ses oûyes avou l’cwane di s’cèn.dré. Là wète ène sakwè hein, sospirait l’Papa, qu’estait presse à brère ossi. Ah, dji vos djurequi li p’tite tiesse di via n’estait nén à st-auje divant Monsieur l’inspecteûr. Ni l’tiesse d’èlèphant non plus, qui fiait balancî s’trompe et qui chèyait ses grandès orèyes comme s’il avait vlu les fé tchère.

Monsieur l’Inspecteûr, qu’est – in savant pourtant, a dmèré longtimps à rèflèchi sins lèver l’mot. Tos les problèmes d’arithmétique qu’il a yeu `discomèler dispû qu’il est dins l’mestî lî chènenut dèl’keukeute à costé do cén d’audjoûrdu. Mins i n’pout nén dmèrer asto don, Monsieur l’Inspecteûr. A l’fén des féns là ç’qu’il a dècidé.

– Les èfants ont l’âdge et is n’sont nén malades . Il-ont l’parole et l’raison . S’il-esténn’t chalés ou bossus ou min-me bèguiaus, ça n’les èspètchrève nén d’fréquenter li scole. Il-ont des droles di tiesses, swète. Métons qu’ c’est èn accidint ène miète pire qui d’tchafî en causant ou bwèstî en rotant.

C’est bén ça èndon ? D’abôrd, i gn’a rén d’ôte à fé. A dater di dwin, i faut qu’il èrvauche à scole tos les deus. Après tot , ç’ n’est qu’in laid momint à passer. Vos n’sâriz tot l’min-me  nén les catchî tote leu vîye. On s’abitûwe  à tot, et on s’abituweré à les vôyes come is sont. Après quinze djoûs, i gn’a pus person-ne qui s’è r’toûn’rè. Ostant comincî tot d’sûte. Djîi r’vérè al samwin-ne vôye si vos avoz respecté li lwè.

Là d’sus l’Inspecteûr, qu’àvait d’visé al mode di Salomon, è n’n’a n’n’alé en lèyant l’ famile si d’lamén’ter à st’auje. Li lèddimwint au matén, li sinceresse trin-nait Mimîye et l’sincî trin-nait Bébert sus l’vôye dèl sicole. Les prèmis djoûs ça sti in vrai calvaire po les deus èfants. A-t-on ri d’zèls ! Leu z-a-t-on fé des èguègnes di tote sôrtes ! Come mète du pérzin dins les orèyes da Mimîye ou taper des pommes à tiesse da Bèbert po vôye si les rascoudréve avou ses mwins ou avou s’trompe.

Mins Monsieur l’Inspecteûr avait raison. Ça a duré ène miète di pus qu’i n’avait pinsé, mins après chî samwin-nes , on n’sondjait pus à rire dins l’classe quand Bébert montait d’sus l’estrade po rèciter en balançant s’trompe ses orèyes « Le renard et le bouc ». Dins l’classe des fèyes non plus on n’riyait pus à rôler padzos les bancs quand Mimîye, sitampèye divant tot l’monde, rèpètait l’tchant qu’èle apurdais po les prix. Au comincemint qu’leu moman les èvoyait au boutique, li mârtchand d’légumes sauvait l’salade padzos l’contwère quand i vèyait intré Mimîye Tiesse di via.

Avou Bébert, c’estait pus malauji . Il aréve pris n’impôrte kwè n’importe èou,èndon . Il, avou s’trompe. Ossi, Bèbert estait todi rade sièrvu allez ! Et on l’rimwin-rnait jusqu’à l’uche li pus rade possibe. Lès èfants n’èl’ rimârquénn’t nén, et pwis, ça ossi ça a passé. ET là wez qu’au rindadge des prix Bèbert et Mimîye ont sti chackén les prèmis d’leu classe. Il avénn’t vlu mostrer qu’on pout awè ène drole d’alûre et quand min-me n’nén yesse pus biesse qui l’zôtes. Il apurdénn’t leus lèçons à fond tos les djoûs et les r’passer quand i falait. Tantiaqu’is n’sondjénn’t pus, lèye à sucî s’pôce, li à forguiner dins s’narène. C’est po ça, qu’én matén en s’lèvant, is sont sintus tot droles et tot lèdgères : is ravénn’t tot les deus leu bèle pitite tiesse comme divant. Ci qu’ c’est, hein, quand on n’a nén l’timps d’sondjî à ses p’titès passions ! Come èles sont rade rovîyes .